عصير الخيار

تنويه قبل قرأه أي سطر في مش عايز أتجوز ، كل التفاصيل مش شرط تكون حصلت وان حصلت مش شرط زى ما هو مكتوب ولا يوجد أي صفة ترابط بين الواقع والمكتوب بشكل يوحى بالإشارة لاى شخص كان ، شكرا لكم .

القصة الاولى من سلسلة مش عايز اتجوز كاملة

عصير الخيار

أول مرة في حياتي اشرب عصير خيار لما اتقدمت لناس " الاجة " ايوة خيار في حاجة أنا مكتبتش حاجة غلط وصدقوني كان خيار ، المهم عايز تعرف التفاصيل كمل القصة .

التفاصيل الخاصة ازاى وتبع مين مش مهم ، اخش مباشرة على لحظة دخولي باب الشقة .

دخلت المنزل حاجة أخر الاجة الحقيقة نظيف ومرتب ومريح ، جيد التهوية وبارد ، كنا في فصل الصيف تقريبا سنة 2002 والبيت كان قدام حديقة مشهورة في مدينة نصر .

دخلت من باب الشقة اخدتنا الشغالة في دهاليز كتير وكل مكان نعدى علية فيه قطع أثاث جميلة جدا ، كل صالون محطوط حولية إكسسوارات من الغالية الفخيمة اوى ، إلى مذهب والى فضة بصراحة أنا أتوهمت كنت عايز الف وارجع تانى بس خلاص دخلت يابرنس .

قعدنا شوية وجيه اخو العروسة شاب إن شوفتة في الشارع احس إن آخرة في التعليم إعدادية ، يرتدى قميص احمر في اخضر في ازرق في اسود بتكوينات غريبة وبنطلون واسع اوى مخضر شوية ايون انا شفته مخضر انا حر بس هو الحقيقة كان بنطلون جربان ، أول كلمة يقولها كانت " مسا النور يا أساتذة منورين والله " ؟!!!! .

الناس الى معايا كلهم ردوا على الترحاب بتاعة إلا انا بلعت ريقي وبلمت ، وفجأة ، صاح بعلو صوتة " انتى يابت اندهى سِتيك ولا اقوليك خلاص هاتى حاجة بس للبهوات يشربوها " .

انا بصيت للواسطة الى جيبانا لقتها قاعدة منشكحه ، يخربيتيك أنتي فكرانى هبقى فرحان على الآملة دي ؟

المهم رفع موبايله الى معرف شارية ليه أصلا ، ايوة يا اما انتى فين يلا تعالى بقى الناس هنا .

دقيقة والأم جت بسم الله ما شاء الله المعلمة فضة المعداوي في الراية البيضا بس على تخين شويتين لا اربعة ، أول مرة افهم ليه دهب الفراعنة اختفى .

وهوب

اهلا اهلا اهلا يا حاجة " دي كانت ام العروسة ودخلتها علينا الوكر إلى قاعدين فيه " ، طريقة القبلات الى خدتها امى كنت هارجع بسببها ، أهلا يا استاذ بسم الله ما شاء الله والله باين عليك محترم ، أنا اتصدمت أمي الى ردت دة من ذوقيك يا حاجة تسلمي وتعيشي .

انا في بالى تسلمى وتعيشي لازم القاعدة دي تخلص بسرعة قبل ما امى تتحول ، وأقعدت أفكر اخد وش اية كيف حالكم ولا اعمل اية في الموقف المنيل دة .

المهم قعدت كلام كلام كلام وانا عايز ارجع باى شكل ، الأم الى اخدت مبادرة الحوار كله وبصراحة كانت ذوق كنا بنتكلم عن الاقتصاد والسياسة بطريقة سياسة امك يا واد يا مزيكا .

شوية قوم يا وائل انده نر نر.
حاضر يا اما ، ورفع الموبيل يكلم نرنر
كان نفسى اسأل مين نرنر ؟؟؟!!!!! بس سكت.
ايوة يا نرجس انتى فين طب يلا تعالى .

وكملنا كلام ، العروسة جت بعد شوية ومعاها صينية المشروبات ، كبايات شيك اوى بس جواها حاجة خضرا !!!! انا قلت يمكن قشر بطيخ في الاول بس ما علينا .

المهم سبكوا من البطيخ والاخضر خلونا في العروسة ، الحقيقة انا معرفش ازاى دي مع دول ، البنت توأم حلا شيحة ، وصوتها يلهوى كروان ، ازيك يا طنط ازيك!! !!

طنط مع دول يكووولش يا نرنر خالص !!

قعدت وامها دبتها على ظهرها بنتى نرجس اخر العنقود لسة مخلصة " اة يو سا " تقريبا قالتها بالشكل دة ، البنت ادخلت بسرعة AUC يا ماما ، و أنا عارفة بقى " دي الأم بتقولها وهيا بتضحك" احكي لهم انتى يا حببتى ، وقعدت نرجس تحكى هيا خريجة اية ومعاها كورسات آية ، و حضرتك بقى مخلص أية .

انا شاورت على نفسي بصباعى وقتلها مين انا !!!
اة حضرتك

مبقتش عارف ارد ، ارد اقول اية " احية احية "قولى حضرتك كدة تانى
نظرات طوييييييلة
وبعدين اخوها بيهزر اية يا باشا انت نسيت ولا اية هاع هاع هاع هاع
وكلة وراة هاع هاع هاع هاع

وبعدين في القاعدة الى ما يعلم بيها الا ربنا دي
انا معايا كذا ومكمل تمهيدي كذا وبحضر دراسات في كذا
وسكت وبقيت بقول دا تعليمي كله ميجيش نص الى صرفته البنت دي في دورة من الدورات، أنا أية إلى جبني النهاردة بس .

امها بسم الله ما شاء الله والنبي شكلك محترم وابن ناس

اية حكاية محترم دي الى كل شوية تقولها ؟!!!

ورددت الكلمتين الى قالتهم امى بالضبط بنفس الطريقة لحسن حد يقول عليا قليل الذوق ولا حاجة .

وانت بقى يا حبيبي شبكت قبل كده
اة يا حاجة ومطلق
انا قلت الكلمة دي الوشوش قلبت على الكفار وقت غزوات بني قيعان ، نهار أسوح انا شتمتهم ولا اية

الام اتلفتت للواسطة مع تحريك بسيط بالأصابع بشكل فج اباحى قليلا أية يا حاجة مقولتناش يعنى انة مطلق

لا يا حبيبتشى دة كتب كتاب بس مش دخلة
اة طيب ، مع مصمصة شفايف

أتفضلوا اشربوا ، انا في سرى هية هية هية اخيرا هعرف اية الأخضر دة ومديت أيدي أول واحد ، طفس طفس بقى بس الفضول هيقتلنى ونفسي اعرف أية ده ، وبعدين شكل ألجوازه مضروبة أصلا .

واخدت بق مبلعتوش الحقيقية انا مش عارف هل من الممكن في الطبيعة ان السائل بعد مايخش من البق ينزل من المناخير !!!

وشرقت ووشى جاب احمر واهلى يخبطوا على ظهرى واخوها قام يخبط على ظهرى و امها تقولى سلامتك يا باشمهنديز مين بيجيب في سرك تلاقيها العروسة القديمة ، هاع هاع هاع هاع

حد ياخد الكائن دة يرمية من البلكونة الله يخربيتكوا ع البيوت الى جمب بيوتكوا انا مش قادر هموت اية العك الى انتوا جايبينة دة .

طعم الخيار في المناخير شكل تانى بجد جربوة هتحسوا بدماغ عالية جداااااا

ابتديت افوق من الصدمة وانى لازم اطفح الى قدامى ، بكل اسف فعلا طفحتة والى استغربتلة ان كل الى قاعدين شربوة لا وكمان علامات الاستمتاع على وشهم .

امى بتسأل بعد شوية اية دة
ده البنت خديجة بتعملة بطريقة غريبة كدة مبعرفهاش
العروسة ردت " كيوكمبر جويس "
انا ترجمت مندهش عصير خيار !!!!!

يالهوى هما فاكرنا معيز !!!!

الحمد الله كورس عصير الخيار خلص بالسلامة وبعد شوية جية الشاى بالجاتوة ، وبعدها الحلو كان " ام على " وكل الأصناف دي كانت طبيعية بالنسبالى بس مكلتهاش عشان انا عامل دايت بقصد كفاية عليا الخيار الى طفحتة .

خلصنا قاعدتنا ، وبصراحة الوشوش كانت اتعدلت بعد ما انقلبت في موضوع الطلاق دة ، بعد ما انحشرنا في عربيتي من جديد الواسطة بتقولي اية رأيك بقى ناس كمل أخر شياكة وبنتهم اخر ادب ومتعلمة ومثقفة وجميلة أكيد متقدرش تقول لاء .

انا مفتحتش بقى غير بسؤال هو أبوها فين ، كان الرد السريع في الجزارة بتاعتة معلش هو قال أخوها يقوم بالواجب وان حصل نصيب نقعد مع بعض .

الواقع ان الموضوع دة خلص بعد زن شهر كامل في البيت عليا ، انا شخصيا مش متخيل خال الولاد ولا جدتهم يكونوا بالشكل دة ، وبعدين موضوع الخيار دة قفلنى اوى .

قصر الحديث محدش يروح لعروسة ساكنة قدام جنينه مشهورة في مدينة نصر .

-------------------------------------

منتظر رايك يهمنى عشان انزل القصة الى بعدها .

Add Comment

Stories

Saturday, October 15, 2016

عصير الخيار

About mosaeid

Labels

Mohamed Saeid